World Samoan Assemblies of God Fellowship

LEADERSHIP TEAM

Talu ai ona o le mafua’aga na fa’avae ai le Felosipi a le Fa’apotopotoga a le Atua a Samoa i le Lalolagi, ina ia fai lea ma sui o le Atua mo le fa’aevagaliaina o le lalolagi, ma ia faia ma tino tu’ufa’atasi e tapua’i ai i le Atua, ma faia ma alava’a o le finagalo o le Atua ina ia fausia se tino tuu fa’atasi o le ‘Au Paia e foliga fa’amaoni i lona Alo,

Talu ai, ona o le Felosipi a le Fa’apotopotoga a le Atua a Samoa i le Lalolagi ua fa’atuina mai na te tauaveina ma fa’aauauina le alafua fa’a-Aposetolo o lo’o i le Feagaiga Fou i le a’oa’oina ma le una’ina o le ‘Au Paia ina ia papatisoina i le Agaga Paia e mafai ai ona fai galuega fa’aevagalia i le mana o le Agaga Paia i fa’ailoga ma vavevga i le atoatoaga o le gaioi mai o le Agaga Paia ma fua o le Agaga Paia fa’apei ona iai i le Feagaiga Fou mo le fausiaina ma le tapu’eina o le tino o Keriso:

O i matou o le mafutaga fa’a-Penetekoso, papatisoina e le Agaga Paia mai i Ekalesia ta’itasi i Matagaluega e lima i le talitonuga tu’u fa’atasi  i totonu o le Felosipi a le Fa’apotopotoga a le Atua a Samoa i le Lalolagi, ua ta’u fa’apu’upu’u O le Felosipi, o lona fa’amoemoe e lē ina ia pulea fa’amalosi Ekalesia ta’itasi o le Fa’apotopotoga, po’o le aveeseina fo’i o aiā fa’a le Tusi Paia ma aiā tatau fa’a le tagata soifua, ae ia aloa’ia ma tapu’eina auala fa’ale-Tusi Paia ma le fa’atulagaina o tapua’iga i le agaga tu’ufa’atasi, mafutafuta fa’atasi ma galulue fa’atasi i le galuega a le Atua, fa’apea fo’i ma le fa’atonutonuina o auala e lē talafeagai ma le Upu a le Atua atoa ai ma talitonuga ma amioga sesē, ma taumafai pea e tausisi i le agaga e tasi ma le fusi o le filemu “…. seia tatou o’o atu o i tatou uma lava ma le loto gatasi i le fa’atuatua ma le iloa lelei o le Alo o le Atua ina ia faia ma tagata matua ia o’o i le fua o le ua matua, e tatau ma le tumu o Keriso”